عائلة السيف في بقعاء

بسم الله الرحمن الرحيم

سوف اكتب هنا موجز يخص السيف اهل بقعاء إبتداء من  الشيخ براهيم بن سيف (مفتي الديار السعوديه) على وقت الدوله السعوديه الاولي والثانيه.

واتطرق عن النسب وبعض الاعلام البارزين من الاسره حتى يكون عندك كم من المعلومات والحقائق وتستطيع ان تلخص منها الشي اللي يناسب ذكره.

الشيخ ابراهيم بن سيف (هو ابراهيم بن محمد بن سليمان بن سيف بن خميس بن محطحط بن مقيبل المسيكي السبيعي العنزي)..

ولد وترعرع عند خواله (السويلم من البدارين من الدواسر )

في بلدة ثادق لأن ابوه محمد بن سليمان حين حصل بينه وبين اخوانه سوء تفاهم خرج من ديار السبعة حول الشملي  واتجه الى نجد واخوه حمود اشمل الى ديار الشام واخوانه نغص ونغيص بقو في ديارهم ثم انتحو للشمال ولكن رغم الظروف الزمانيه والمكانيه الا اننا متواصلين الئ يومنا هذا.نعرف كل من ينتسب لمحمد سوا ضنا ابراهيم او ضنا غنيم ولكن الحمود تم الالتقاء بهم في الاردن وهم عائله كبيره وعزيزين ولهم مكانه في ديارهم، واما سلالة نغص ونغيص فكانو هم اطيب منا وأحرص علئ لم الشمل بعد كل هالسنين لكونهم يعلمون عن ديارنا وتاصلهم اخبارنا ولازالنا معهم ماتطالعنا الدم ونلتقي بسليمان ابن سيف وهم عزوتنا وعصبتنا طال الزمن او قصر.

وبالنسبة لسيرة الشيخ ابراهيم تعلم على يد الشيخ عبد اللطيف بن محمد بن عبدالوهاب ووصل في العلم ماوصل وابنائه مشايخ ومنهم الشيخ محمد بن ابراهيم بن سيف قام الامام فيصل بن تركي بتكليفه الى حائل مع بداية حكم الرشيد ويسمى (قاضي الجبل) وله قصيده موجهها الى امير حائل عبدالله بن رشيد وتتكون من ٢٧٣ بيت تسمى النصيحه لانها شامله لجميع الامور وتم تاليف كتاب من المؤلف فضيلة الشيخ:

أ. د. عبدالله بن محمد بن أحمد الطيار

عضو التدريس بجامعة القصيم

بالرابط:

 https://draltayyar.com/books/77120/

 

والشيخ محمد له ولد وحيد اسمه سعد وهذا اللي جاء الى بقعاء ومناسبة جيته بقعاء انه يوم جاء يبي يزور ابوه في حائل وفي اثناء الطريق مر على قرية الكهفه وصادف صلاة العصر وصلى مع اهل الكهفه والصدفه ان خطيبهم بعد الصلاة قال صلو صلاة الغايب على الشيخ محمد بن سيف وصلى صلاة الغايب على ابوه مع اهل الكهفه وواصل طريقه للامير عبدالله الرشيد ويوم دري ابن رشيد انه ولد الشيخ محمد قال له انت مكان ابوك ورفض بحجة ان القضاء يحتاج علم وهو ماهو بهالمستوى وقال له نحطك امير على تيماء قبل ابن رمان ورفض قال مابي إمره وفي هالأثناء جو اهل بقعاء للامير ابن رشيد يطلبون خطيب للديره وقال ابن رشيد هذولا اهل بقعاء يبون خطيب تبي معهم ووافق وراح معهم وقامو بإكرامه فهم اهل كرم وجيرة طيبه ويعزون والده الشيخ محمد لانه تجمل معهم بالصلح بينهم وبين الجعفر من شمر (مخالصة الجعفر واهل بقعاء يوجد بها وثيقة رسميه) وهذا اللي جعلهم يحتفون فيه ويقولون انه ٦٠ يوم وهو كل ليلة عند واحد من اهل بقعاء بواجبه واستانس عندهم وحتى يومنا هذا وحنا مستقرين بينهم في عز ومعزه.

ومن اشهر هالاسره ولد سعد 

محمد بن سيف

اللي اشتهر بكرمه في وقت فقر وشاع صيته الى درجه ان كل من طب الديره يلفي عليه، ويوم سمع بذكره الشاعر( معيفن التبيناوي)حاول ان يكتشف بنفسه لان الشعار مايمدحون الا من يستاهل ويوم جاه شاف كثر اللي يسمع وازود ورجع على التربيه وسأله ابن عمه اسمه مطير قال وش لقيت بهالروحه

وقال قصيده بمحمد بن سيف (ابو فهد)

يقول:

ياما حلآ بني الغرايب على الكيف

.... وإبو فهد يامطير سيرة مشدّه

طرآه كثر الرجل بالشبط ومحيف

.. وحاف الزمان وشفت ناسٍ تردّه

وبانت فوآيه حلوةٍ عند ابن سيف

......لآجوه هتاش البراري يمدّه

لآجو هجافا فوق مثل الشواحيف

.......يجيب ماحاشة يمينه وكدّه

وحلوٍ ومرٍ بالدلال المهاديف

........أناسة اللي يركبون الإشدّه

بشواميٍ يطرب لهن راعي الكيف

......الله على الأجواد ييْسرْ بْمدّه

مْهبوب ربحٍ للمسايير والضيف

....(ريف الهجافا)نافلٍ كل بدّه

للممحلين ابو فهد بالدهر ريف

.....ماهو من اللي لقمته بس قدّه

ولاهو ثميدٍ نشّته بأول الصيف

...... عدٍ ليآمن تنفصخ كل شدّه

ولاقول لآحلّت طواريه ياحيف

... ابو فهد من عدْ الأجواد عدّه

بْحقٍ حقيق عدْ مابه ليآشيف

....مثل هكاللي دون ربعه يسدّه

ولمحمد بن سيف مواقف وقصص كثيره ولكن ابي اذكر وحده وذلك عن كرمه المفرط في وقت كانت الناس بفقر وقل

وهالقصه ناقلها من الشيبان وكذالك مكتوبه في كتاب اسمه (قطوف الازهار) وموجود في المكاتب مؤلفه السويدا او الخلف ماني متأكد من اسم المولف.

المهم

القصه 

يقول في احد الليالي كان عند محمد ابن سيف عشاء ومتجمعين الناس عنده وصدف ان (ابن عبيكه ) شيخ من شيوخ الرمال لفاء عليهم ويوم حصل المناسبه فايته دخل في مجلس ابن سيف مع الناس وكان محمد بن سيف كفيف البصر وهذا اللي خلا ابن عبيكه يتطمن بأن محمد ماراح يدري فيه حتى تنتهي المناسبه، ولكن احد الموجودين يعرف ابن عبيكه عز المعرفه وقال له (حيالله ابن عبيكه.ورد عليه انك واهم)  ولكن ابن سيف انتبه وكان يعرف صوته تمام لانه صديق له من زمن طويل وقال انت هنا يابن عبيكه قال ابن عبيكه ايبلله يابو فهد قال ليه جاحد روحك قال والله لقيت كل شي فايت واللي تبي تسويه لي مسويه قبلي وقلت اشارككم واواصل دربي لاني مستعجل

قال ابن سيف حياك الله .ويوم قلط عشاه قال للموجودين لاتروحون اثريه ذبح للظيف وعشاه على النار

وقام بتقليط واجب ابن عبيكه وقال سمو على واجب ابن رمال

وزعل ابن عبيكه من هالتصرف وقال يابن سيف (انا اطيب ربعي والله اني أقوم بتاخير الغداء للمغرب والعشاء لنصف الليل غديه يوافق مرار طريق وانت عشوين بليله!!؟؟ قال له ابن سيف (مدامه خضراء لاتحسّب.وانت تستاهل) قال له ابن عبيكه لكن هذا فسق والله اني خايف ان يجي يوم ماتلقاء اللي يجملك مع الناس.. وسبحان الله كأنه يعلم بماء يخفيه الزمن

يقول غازي بن عبدالعزيز بن سعد (كنت ماسك يد  محمد وكان عمره 11سنه يقول اني شفت ابن عبيكه مقبل وقلت ابشر  هذا ابن عبيكه لافي علينا يقول انه قال (لذ بي لذ بي عن وجهه لايشوفنا والله اني ماأجد اللي أقلطه له..غديه يلفي على امير الديره 

وهذي مصداقيه لكلمة ابن عبيكه  اللي قالها قبل سنين !!

والئ يومنا هذا مجلس  محمد ابن سيف  رغم انه خرابه ماهدوه كان فهد ابن محمد ابن سيف رحمة الله عليه يقول والله ماإهد هالمركا اللي حتا الجنازة ارتكا عليه(الجنازه هو عبدالعزيز الرشيد)

كان في عهده خيّم حول بقعاء وطلع له محمد واللي ماسك يده  غازي الله يرحمه وكان يقص السالفه بحذافيرها وانا موجود يقول

ماسك يد عمي محمد يوم اقبلنا علئ مخيم الجنازه شمال بقعاء وهو متصدر المجلس يقول هو يقوم ويهلّي  يقول له ياهلا حيالله ابن سيف حيالله حاتم الصخا حيالله ريف الهجافا

(بكناية حاتم وابن مهيد .. لانه كريم)

يقول رد عليه ابن سيف

هلا بعنتر التالين (كناية للشجاعه يشبهه بعنتر مثل ماهو شبهه بابن مهيد)

يقول الا واحد من خوياه قال ولْ ياهالعماء تقل مولّمٍ المردْ من العام (مستغرب من سرعة بديهته)

قال الجنازة بس يابن سيف انا اشجع من عنتر . عنتر ذلْ من الثور وانا ماذليت 

قال له ماجيت احكّم بينكم لكن تر عشاك انت ومن معك الليله

قال من قو يابن سيف الله يغنيك

وقام بواجبه وبعد العشا يمسك قوارير الطيب يصبهن فوق راسه وكان شي نادر ويقول نثرت الطيب يابن سيف قال ادري ماجاينا اطيب منك ياخو رثعه

والقصص كثيره 

وكلها تبيض الوجه

..

ومحمد بن سيف من عياله اللي صار لهم صيت

فهد السيف

كان راعي دين وخطيب وقلمه كالسيف ووجيه في المنطق وشاعر

وكان له مواقف تسجل له

ومنها موقفه امام الأخوان هو وغازي البرجس من كبار اهل بقعاء حين كتب خطاب لإبن سعود وكان مخيم في الخاصره وبعثه عليه وكانو الاخوان في طريقهم على الديره

ومضمون الخطاب مبايعه في طاعة الله بشروط حفض الاعراض والاموال وحصلو على خطاب يحتوي امر من ابن سعود(انه من يقبل على بقعاء ينسفه على اليمنى ويرد على عيوج او على اليسرى ويرد على التيّم .. وهالخطاب جعل ابن ربيعان بعد ان خيّم حول الديره ..سلمه فهد السيف الخطاب وقال له (يابن ربيعان الذيب ماياكل من ذرعانه )وكان يقصد بها اثارة الحميه عند ابن ربيعان لان اهل بقاء من عتيبه .

وفعلا نجح في هذا وقام بإكرام ابن ربيعان واللي معه وتركو بقعاء بسلام

ومواقفه كثيره ولكن لاتحظرني

وفهد بن سيف شاعر ولكن من الناس اللي مايحرص على كتب قصايده وكان يترجل في قول القصيده وكان حوله من يحفض والا تروح بوقتها ويوجد عندي له كم قصيده ولكن ابي اكتب لك هنا قصيده تدل على إيمانه الراسخ 

ومناسبتها

كان في عمر يناهز ٦٥ سنه وتزوج زوجة صغيره بالعمر ماتجاوز عمرها ١٥ سنه ولكن اللي حصل ان الله قدّر له انكف بصره في ايام زواجه وهذا ماله علاقه بالزواج ولكن الناس من حوله صارو يقولون (لو ماأعرس كان ماإنعمت عيونه)

وكلامهم هذا أزعله خاصه وان عنده يقين ان هالشي مكتوب ولاله علاقه بعرس او غيره

وهي بإسلوب ووحبك يصعب على الشعراء في هذا الوقت تطريز مثلها

يقول:

طارٍ طرا طيّر كرى النوم عنّي

..... بالصدر كنيته ولآني بمبديه

بجآرٍ جرى جرآّه ربْ إمتحنّي

..... والعبد ماله غير مآراد واليه

والناس شمّاته بهم سوْ ظنّي

....ولاينشمت بالعبد والله ممشيه

العبد لو يركض ولآيرجهنّي

.... ولو ياصلن إليآ (جبل قاف)رجليه

ولو هو على طول الدهر مايونّي

... ماله سوا إلا ماكتبْ له وياتيه

وقولٍ بقولة(لو)عمل كل جنّي

.... تفتح عمل شيطانكم لوّه وليه؟

اللي مقدّر مايردّه تمنّي

..... واللي يْحاذر مايفكّه تمذْريه

واللي إنكتبْ باللوح لو تستكنّي

...... تسوقك الأقدار لمآ تْلآقيه

مار أنصح اللي يقبل النصح منّي

.... يخلصْ إموره بس لله ويكفيه

(عام 1362)

..

وله قصيده ابي اكتبها ومناسبتها انه راح للرياض واخذ فتره هناك وهزّه الشوق 

وكان في الفتره الاولى من زوجته وكان خوياه 

رجال من الجماعه من السيف

وهي غير كامله 

يقول

البارحة ساهرٍ والقلب مشطوني

.....وحولي ركودٍ وانا ماغمضت عيني

قل للجماعه (هل العرفا)يشدوني

....وإخص خمس حوو مع طيبهم ديني

الصبح من(قصر ابن مقرن)تمدوني

.... والعصر (بالهوبجه)وإنتم معشيني

ولافات من ليلكم ثلثينه أودوني

..... دكو على جيشكم دام الله مْعيني

ولاجيتو (قصر اللويمي)به تحطوني

.....يجي مع اللي يجون هناك شفقيني

قولو بْمن قاد رزقْ الخلقْ بالهوني

.....إنته على الدين او بدلت للديني؟

وقوله اني ومْنْشي الغيم ومزوني

......إني على خبره وباقي على الديني

(عام 1364)

..

وكذالك من السيف اشتهر صيتهم في العهد الأخير

غازي وسعد ودحيم ومعروفين ب(اهل المناخ)وكتب عنهم في كتاب اسمه (نوادر من التاريخ)

وقيل فيهم قصايد مدح وكانو يستاهلون لانهم في وقت قاسي ومع ذلك بان علمهم

والقصايد ابي اذكر منها قصيدتين مع العلم انها قصيره لانهم مضيعينها وهذا طبعم مايهتمون بالشي اللي يخصهم

قال فيهم الشاعر (ابن عميّد)شمري

ومناسبتها انه لفاء على واحد من الديره ويوم شافه اختفا عن وجهه مع العلم انه غني مال

وقال:

ماتصير مثل السيف ياطافي النار

.....يهلّون قبل العرف عجلٍ سريعي

أهل دلالٍ والماتٍ على النار

..... يباري لهن تمر الدقل بالتسيعي

..

وقال فيهم الشاعر الذرفي 

يقول:

شبتو على طيبكم يالسيف

...... ليآشفتو الضيف حييتوا

يوم الردي مثل يرق الصي

.....انتم علئ الطيب عييتوا

.

وبالنسبه لقصايد غازي

كان ولده محمد متغرب عنه في حفر الباطن وجاه خبر وفاته وكان عنده اطفال صغار

وكتب مرثيه

يقول:

علمٍ لفانا يقطع القلب ويْشيب

....ويقدْ صندوق الحشا من محلّه

ابو غنيمٍ راح مابه تكاذيب

..... الله يونس وحشته في محلّه

حليت والله ياحصان الاطاليب

..... وخليت ورعانٍ صغارٍ على الله

لو بالبكا خير ابقنب كما الذيب

......والله لأبكي اليوم والدرهر كلّه

عليك ياللي مالقيبك عذاريب

...... وإلا الحميّه نافلٍ كل ملّه

ياما ركبنا فوق عوج المصاليب

.......وجينا ديارٍ به ثلاثين ملّه

واليوم شبنا والدهر به شواذيب

...... الله يغفر الذنب دقّه وجلّه

ولسعد السيف 

قصيده فيها من الحكمه والنصيحه الشي الكثير 

وغازي شاعر وسعد شاعر

وابي اكتب قصيده فيها صور رائعه وابداع 

ومناسبتها انه بعد غربته في الشام مع ابو حنيك 14سنه رجع لديرته واستقر وصار له مكان ومضياف ماينقطع من الضيوف

وكان كريم وماسك المكان بصوره دايمه وكان حوله عيال اخوه غازي يعاونونه ويحتفون بالضيوف ويوم كبرو وصارو شباب

راحو يدورون الأشغال في حفر الباطن

وفقدهم يوم راحو خاصه وانهم كانو دايم حوله ومن واقع خبرته ومعاناته في الغربه حاول يوضح لهم اللي يبيه لعلهم يطاوعونه 

وكتب قصيده يخاطب الكبير منهم واسمه حمد

يقول:

لياحمد شاور صليبين الأشوار

.......يالقرم دور خيرٍ تستشيره

كيف الرجل يعاف مرباه والدار

......مع غرستٍ مامثلها بالجزيره

أقبل وشب النار للضيف والجار

........ترك سراجٍ صار نفعه لغيره

والله ماقلته نبي منْك دينار

.....نبي نشوفك والليالي قصيره

حنا صبرنا يوم قلآت الأسعار

.....واليوم كلٍ عايشٍ مثل غيره

تر لاحصل دينٍ وسترٍ وتعبار

.......هن راس مال الرجل مالك بغيره

واللي جمع شيٍ يخليه بالدار

.....ولاينهج الا بخامتٍ من قصيره

وهذا اختصار لمذكرة السيف 

مع العلم بأني لم اتطرق الئ الشعراء او المشهورين منهم في الوقت الحالي

وكذالك لم اتطرق لاخو الشيخ ابراهيم وهو الشيخ غنيم في الرياض